Kuvendi i Republikës së Kosovës

Kryetarja e Kuvendit, Dr. Vjosa Osmani, pjesë e forumit të parë Ballkanik kundër Antisemitizmit

28.10.2020

Osmani: Antisemitizmi dhe çdo formë e diskriminimit përbëjnë sulm kundër dinjitetit njerëzor
 
Kryetarja e Kuvendit, dr. Vjosa Osmani, ishte e ftuar në Forumin e parë Ballkanik kundër Antisemitizmit, i cili u organizua nga Kuvendi i Shqipërisë, në partneritet me Lëvizjen Kundër Anti-Semitizmit dhe Agjencinë për Hebrenjtë të Izraelit.
 
Në këtë forum pjesëmarrës ishin edhe Sekretari i Shtetit të ShBA, Mike Pompeo, Presidenti i Parlamentit Evropian, David Sassoli, Kryeministri i Shqipërisë, Edi Rama, Kryetari i Parlamentit të Izraelit, Yariv Levin si dhe kryetarët e parlamenteve nga vendet e rajonit, ministra, deputetë, përfaqësues të lartë të Kombeve të Bashkuara, si dhe shumë pjesëmarrës të tjerë nga rajoni dhe bota.
 
Ky aktivitet u organizua online për shkak të pandemisë Covid-19 dhe kishte për synim krijimin e një fronti të përbashkët të vendeve të Ballkanit për të luftuar antisemitizmin.
 
Kryetarja Osmani e cila ishte e ftuar nderi në këtë forum, vlerësoi lart punën e organizatorëve, në veçanti angazhimin e Parlamentit të Shqipërisë si nikoqir të këtij forumi.
 
"Në shekullin 21, nuk ka asnjë justifikim për asnjë formë diskriminimi, për sulme ndaj njerëzve apo njerëzimit, sepse çdo veprim i tillë në vetvete përbën një veprim të drejtuar kundër dinjitetit njerëzor", ka thënë kryetarja Osmani.
 
Duke rikujtuar rolin e shqiptarëve si në Shqipëri, poashtu edhe në Kosovë për mbrojtjen e hebrenjve gjatë Luftës së Dytë Botërore, ajo tha se: "Bujaria dhe toleranca fetare janë disa nga tiparet më fisnike të popullit shqiptar. Shqiptarët e kuptuan më së miri dhimbjen, tronditjen dhe vuajtjet e hebrenjve, për shkak të luftës së tyre shekullore për liri dhe paqe".​